前港姐寇鴻萍老公梁廷鏘涉嫌捲入 o靚模迷姦案，一名 o靚模聲稱在他旗下酒吧 Fevar Club遭性侵犯，事後還被人棄於中環蘭桂坊街頭。
其實，近年每逢週末及假日，大批 o靚模都以最「行」姿態出現蘭桂坊大小 club場，本刊發現，原來「老蘭」多間名人夜場見 o靚模吃香，暗中以一百三十元時薪方式，聘請一班半紅不黑 o靚模長期駐場。
這班 o靚模繼續在場內扮客飲酒，實則工作卻如拳手公關一樣，每日要向老細交酒水交人頭，廿一歲的 Stephanie及夢夢兩名女孩，便因近年 o靚模頂爛市，被迫在蘭桂坊 clubbing駐場搵飯食。
廿一歲、英國蒙古混血的 Stephanie是英國留學生，三年前放暑假回港，經朋友介紹下加入 o靚模行列。
「入行做 model，覺得呢行好好玩搵錢又快，又可以扮靚 show off自己，所以決定留低做 model！」 Stephanie兩年間，先後為不少雜誌報紙拍過廣告硬照，亦與一眾名 model包括 Rosemary出席活動做 showgirl。
「三年前無咁多女仔出來做 o靚模，競爭無咁大，工作機會多，而且每個 job酬勞最少七百蚊一小時。不過近年好多女仔出來爭食，一百蚊一個 job都肯接，有啲新 o靚模為求見報，唔收錢都肯接，越鬥越爛，好難捱！」 Stephanie說行內頂爛市，做 o靚模收入不穩，年頭她更試過兩個月內沒工開零收入。
「但係無收入一樣要支出，重要 keep住買衫、買化妝品、做 facial，因為要 keep住去 casting，唔係根本連開工機會都冇。」 Stephanie無奈地說，為求增加工作機會，開始跟其他 o靚模一樣晚晚蒲夜場，這亦是 o靚模界接 job的「例行公事」。
「夜晚出去蒲你先有機會接觸人，好多製作公司、電影公司、廣告大佬都鍾意蒲，而且摸住酒杯底，同佢哋打好關係，有工開都會特別『照顧』你，有時連 casting都唔使就有工開，好多 job都係蒲 club蒲番來！」 Stephanie坦言，年前她被聘用梁廷鏘旗下 Fevar Club聖誕 party海報的女 model，都是這樣蒲回來。
中環蘭桂坊是名人公子們的蒲點，家住新界 Stephanie為求接 job，一年以來每星期幾晚都不惜搭個多小時巴士，到蘭桂坊名人 club熱蒲，包括老蘭熱蒲點 Sugar、 Beijing、 Billionaire Cliq及近日是非點 Fevar Club。
「我去老蘭玩一輪，慢慢就同 club場負責人熟絡咗，有一晚個經理就行埋來好親熱摟住我，問我橫掂成日出來蒲，不如索性喺佢哋個場返工，佢話好多 model仔都係咁做。個經理仲話，工作性質好簡單，一個禮拜落四晚，好似平時喺度玩咁，計番我一百三十蚊一個鐘。」 Stepanie回憶半年前落疊的那一晚。
她說時薪一百三十當然比不上接 job的市價，但她當時缺錢，工作量大減，又認為自己一向都要蒲，有酒飲有得蒲還有錢收，何樂而不為。
「個經理話千萬不要被人知我哋係受聘，因為始終沒有正式聘用合約，我哋兼職搵外快， o靚模都唔想被人知，尤其經理人公司知道好大鑊。不過，返落工之後，先知道原來個場入邊每晚十幾個 model全部同我一樣『受薪』去蒲！」 Stephanie苦笑地說。
Stephanie痛哭說，在酒吧兼職的 o靚模，每日要交五至十個男客人電話，又要逼客買酒， o靚模淪為女公關，苦不堪言。
Stephanie在場內認識了同齡的另一 o靚模夢夢。夢夢去年城大畢業，讀大學時已開始擔任 o靚模，因外貌像歌星戴夢夢，被 o靚模界改為「城大夢夢」，曾在動漫節與趙碩之一齊做 Show Girl，亦是不少「龍友」心目中的女神。夢夢跟 Stephanie同病相憐，因近年 model收入銳減，半年前亦「半推半就」在蘭桂坊 Clubbing場內駐場兼職搵外快。
二人正式開工後，才知道時薪百三的「真正」代價。
「返咗工兩日，個經理放工行埋嚟黑口黑面，態度超衰對住成班員工咁插我，話我尋晚做咩成尊觀音咁坐埋一角？做咩有客人撩你傾偈你都唔理人？佢話以後一定要主動啲同客人『溝通溝通』！」 Stephanie開始哭訴地說：「佢仲俾咗張增值電話卡俾我，話以後有客溝我，只可以留呢個公司電話俾人；佢仲要求我每晚最少要交五至十個男仔電話俾公司，然後每星期頭要逐個電話 call佢哋上來玩……每晚仲要交數，要屈客人開夠幾千蚊酒水……」 Stephanie哭成半個淚人，靠着旁邊的夢夢亦苦不堪言。
「最痛苦的是每個月出糧，個經理成日拖數，因為出現金，加上無憑無據好多時都剋扣人工。」
來源：http://hk.next.nextmedia.com/template/next/art_main.php?iss_id=1062&sec_id=1000853&art_id=14239198
